قوزى بشرى .. يكتب: كامل إدريس ما تهابش

متابعات _ اوراد نيوز

فيما روي عن دكتور كمال عبد القادر أنه قال ما أنت بصدد قراءته .. فإن صح ما نسب إليه فهو ذاك وإن كانت الأخرى فهو محض (كلامات).

*كامل إدريس … الوصية في الذمة*

اولا

تعيينك كان مفاجئا للكثيرين وقوبل بعاصفة من الرفض في البداية لكن بعضا من الواقعية والقبول بدات تسري في الاوصال ورغم ذلك ستكون مهمتك اكثر تعقيدا مما تتخيل

ثانيا

انسي موضوع شهاداتك وعمرك ولا تجعلها نقطة نقاش فان اكثر من ثلثي الشعب السوداني ما عندهم شهادات ميلاد ولا عارفين ولدوهم متين.مافي زول يبتزاك بالموضوع دا

عادي

ثالثا

بعد اداء القسم مباشرة اقعد مع عمك شوية وقول ليه انا من يدك دي لي يدك دي لكن وريني صلاحياتي شنو وطوالي طلع ليك نوتة وقلم وخليه يكتب بي يدو

ما تكتب انت يكتب هو

طبعا عمك دا غتيت.عادي بنكر

رابعا

طبعا انت عارف شغل رئاسة الوزارة دة كلو من المكتب لكن ناسنا هنا ما بعجبهم الا الزول البتحاوم ويقولو ليك زول ميداني.

عشان كدا ولزوم القبول اعمل ليك حركات استهبال كدا ممكن تلبس اوبرول او حتي جينز وتمشي تزور ليك محول ضارباه مسيرة وتخطب في العمال تقول ليهم سنعيدها سيرتها الاولي ولن ننكسر .ياهو نوع الكلام دا ما بغلبك

اوعي تجيب سيرة سنعبر او ننتصر.عندنا حساسية

خامسا

في خلال حوامتك الاولي اتكلم انك ستركز علي معاش الناس كهرباء موية علاج دكوة امن مواصلات ومحاربة الفساد

اوعي تجيب سيرة حوار سوداني سوداني وكيف يحكم السودان وجذور الازمة.مافي زول شغال بالموضوع دا

سادسا

ما تصدق انو حيخلوك تختار الوزراء براك لكن حاول شوف ليك فريق شرطة كارب من خارج الخدمة اعملو وزير داخلية وقول ليه جيب لي مدير شرطة باختيارك.جيب ليك الف عربية للشرطة ودبل مرتباتهم اربعة اضعاف

غير مواقع وزراء الحركات نظام (اعمل بيلية)انت فاهمني كويس

بقية الوزارات حاتجيك مدردقة من الكاهن.اقبل بيهم واعمل رايح

سابعا

عامل ناس الاعلام باحترام شديد لكن ما تقربهم شديد

ولا تصاحبهم.كان صاحبت جزء الباقين بردموك

فيهم ناس وطنيين شديد وفاهمين وفيهم ناس (……)فهمتني؟

ثامنا

اترك الكيزان ما تركوك

اترك القحاطة ما تركوك

تاسعا

طبعا ناس السيادي كانو مدورين الشغل براهم وفي كلام عن مصايب كبيرة مدورة.طبعا ما بعجبهم تسحب منهم الشغل مرة واحدة كدا.خليك متحسب للعقارب والمطبات والنيران الصديقة لكن ما تتسامح مع الفساد والشعب حيقيف معاك في حرب الفساد لكن اشتغل واحدة واحدة عشان ما يتلمو عليك يركبوك التونسية

عاشرًا

لمًا يجوك ناس الادارات الاهلية وناس الاحزاب ويقولو ليك عندنا خريطة طريق اعمل انك منبهر بافكارهم واديهم كلمتين حلوات ورسلهم للكاهن يدخلهم بي حمد ويمزقهم بي خوجلي

وركز علي معاش الناس

واخيرا

اوعي يجيك زول يقول ليك مفاوضات سرية او علنية او هيكلة اوجيش مهني.الجيش مهنتو يكتل

وانت زول ملكي ساي .ما تهابش كلمتك